Amodau
Daeth tro gaeafol erbyn arsylwadau heddiw, gyda tymheredd oer yn arwain i amodau rhewllyd ar draws ardaloedd eang o'r mynydd, a rhywfaint o eira wedi disgyn dros nos. Roedd hefyd eira yn disgyn yn ystod y dydd gydag eira mwy sylweddol yn dechrau datblygu ar y mynydd.

Y prif anhawster ar y llwybrau oedd amodau rhewllyd o dan draed, gyda rhew yn gorwedd ar y llwybr mewn mannau, a llawer o gerrig y llwybr yn llithrig iawn oherwydd arwyneb wedi rhewi. Roedd hyn yn wir am ardaloedd eang o'r llwybr ar wahanol uchderau, ond yn dod yn anhawster mwy sylweddol uwchben tua 650m.

Gwelwyd eira hefyd ar y mynydd, yn gorwedd uwchben tua 400m, gan fod yn denau ar y cyfan, a heb achosi trafferthion sylweddol i ddechrau, ond roedd ychydig mwy yn uwch ar y mynydd, ac wedi lluwchio a hel mewn rhai mannau. Roedd yr eira yn feddal ac ysgafn ar y cyfan, ond yn cuddio ardaloedd rhewllyd mewn nifer o lefydd, lle oedd angen gofal sylweddol i osgoi llithro ar rew yn annisgwyl o dan haen denau o eira meddal.

Roedd effaith gwynt cynyddol ar yr eira yn uwch ar y mynydd, gydag eira wedi lluwchio a hel mewn rhai mannau, ond uwchben Bwlch Glas roedd y llwybr wedi ei sgrafellu gan y gwynt gan adael dim ond ychydig o eira yn gorwedd yn yr ardal yma. Er y diffyg eira sylweddol uwchben Bwlch Glas, roedd yn rhewllyd a llithrig iawn o dan draed rhwng y bwlch a'r copa.

Diwrnod cymylog a gwyntog gydag eira yn disgyn ar draws ardaloedd eang o'r mynydd.

Gydag eira yn parhau i ddatblygu o dan ddylanwad gwynt sylweddol yn ystod yr arsylwadau, mae'n debygol y bydd mwy o eira yn gorwedd ar y mynydd erbyn ddiwedd y dydd, y bydd amodau yn wahanol eto erbyn fore Sadwrn, ac o bosib yn fwy heriol byth (gweler Gwybodaeth Ychwanegol isod).

Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy bob un).

Bydd cario caib rew a chrafangau cerdded (mountaineering crampons) yn cynnig dewisiadau mwy diogel ar y mynydd. Gydag amodau amrywiol a thenau yn bosib gallai pigau bach (microspikes) hefyd fod yn ddefnyddiol.

Bydd cario gogls (fel gogls sgïo) yn cynnig modd o warchod y llygaid i weld yn rhwyddach er mwyn teithio yn fwy diogel ar y mynydd.

Gwybodaeth Ychwanegol
Ar ddydd Gwener yr adroddiad mae'r rhagolygon yn awgrymu bydd y tymheredd ar y copa o dan y rhewbwynt i ddechrau, gyda cyfnodau sylweddol uwchben y rhewbwynt, a chyfnodau sylweddol o dan y rhewbwynt ar adegau o bnawn Sadwrn ymlaen. Mae darogan i'r tymheredd ar y copa fod cyn ised â -3ºC (gan deimlo fel ei bod cyn ised  â -13ºC ar adegau).

Mae darogan iddi fwrw ar adegau, gydag eira yn bosib am gyfnodau, a glaw yn fwy tebygol ar adegau eraill. Mae eira yn debygol yn ystod gweddill dydd Gwener ar draws ardaloedd eang o'r mynydd, yn bosib nos Sul i fewn i ddydd Llun, gyda rhywfaint o bosibilrwydd yn uwch ar y mynydd ar adegau eraill.

Golyga hyn bod amodau gaeafol yn debygol o fodoli ar draws ardaloedd eang o'r mynydd fore Sadwrn, gydag eira mwy sylweddol na welwyd yn ystod arsylwadau heddiw yn debygol, a posibilrwydd o ardaloedd gynyddol rewllyd hefyd. O ganol dydd Sadwrn ymlaen mae cyfnodau o rewi yn debygol, ond hefyd cyfnodau o ddadmer cyflym ar adegau, gydag amodau gaeafol yn gallu mynd a dod, ond ardaloedd o rew neu eira o bosib yn achosi trafferthion drwy ran helaeth o'r cyfnod hyd nes yr adroddiad nesaf dydd Mawrth.

Mae hefyd darogan am gyfnodau gwyntog, gyda cyfnodau o welededd gwael iawn yn bosib.

Diolch i Smyrff am arsylwadau heddiw.